《急也急不到》
時不時有讀者同我分擔單身愁緒——自覺已經對達身邊朋友逐個結婚生子嘅年齡，但自己就連對象都沒有。自問已經盡力去識人，dating apps都玩到爛，明明唔信教但連教會都返埋，仍然遇唔到人。實在唔想行到雙睇呢一步，成個人又頹又擔心。
個處境的確令人氣餒，明白嘅，我都曾經到過呢個階段。當年我單身，一單身個人就焦急，越焦急就越識埋啲奇怪人。後來打算疊埋心水攬住隻貓過世算喇，有日同朋友快快樂樂去食壽司，點知咁就遇到程仔。眼見好多單身朋友四處張羅都搵唔到適合嘅人，但當佢哋專注生活，將注意力放喺自己身上，然後好對象就相繼出現了。
後來我發覺唔止談戀愛係咁，有時我想寫嘢，喺電腦面前死坐爛坐都坐不出個所以然來。想話算鳩數，去散個步、食點好西、打理下花草、沖個涼，犒賞一下自己，然後靈感總會喺最出其不意嘅時候飄出嚟。
屋企啲盆栽都係咁，種子落咗泥幾個月都完全冇動靜，以為冇啦，正諗住冇眼睇唔理佢，點知佢就出芽，而家幾棵都生到亭亭玉立。
戀愛、友誼、工作都好，人生難免會遇到各式各樣嘅瓶頸。我學識教自己唔好擔心，因為天地萬物自有佢嘅時間表，一套人類頭腦睇唔透嘅時間表，所以有啲事根本唔到我哋愁。
把握機會固然重要，但如果一啲事盡咗力都搞唔掂，就只好暫時放埋一邊，照顧好自己先。唔係要咩都唔做等運到，而係將焦點放返自己身上。即管去扮靚、健身、增值自己，前提呢啲事係要為自己而做，最緊要唔好否定自己。俾啲時間佢啦，人生就係咁鬼馬，轉變自會喺我哋不知不覺間出現。
IG @sis3ter
Search